色狼再現，女球迷小心！唔知各位讀者有冇收過一個電郵，入面播放片段中見到一位日本女球迷，喺球場同國家隊打氣時，俾一位男球迷當眾胸襲嘅悲慘過程。
去球場、廣場大電視打氣人多擠迫，男女球迷輕微碰撞在所難免。好似南韓方面，佢哋「紅魔鬼」齊心團結威震全球；但事實上，南韓同日本一樣，球迷裏面亦有好多鹹蟲乘機博懵威脅女球迷。喺南韓對西班牙前嘅四場比賽，當地警方就捉到一個專強姦女球迷嘅淫蟲，以及多名涉嫌非禮嘅男性球迷。
據警方講，一個男球迷每逢慶祝國家隊贏波時，都會揸車上街接載其他球迷巡遊；呢位鹹蟲嘅對象，就專揀衣着性感嘅美少女，然後喺半夜駛上山將對方淫慾一番。喺嗰四場波總共強姦咗五位少女嘅可恥鹹蟲，到第五晚南韓贏西班牙時，終於俾警察捉到。
從呢兩件事對小記有個啟發，如果女球迷衣着唔好咁性感，慶祝時唔好亂上陌生人架車，類似呢種世界盃非禮強姦案件可能會減少發生。