德國佬殺入決賽靠「符碌」！……嗱，嗱，嗱，呢句嘢唔係我求大俠講，而係佢哋球場死敵英國佬話嘅。英國傳媒連日嚟不斷話德國根本唔配入決賽，唔知你點睇？
英國傳媒論點大致上話德國響成個賽事都無遇過強隊（世界排名較後），另外又話佢哋靠「悶」贏美國同南韓。英國佬同時又唔放過吹捧自己，又提番佢哋贏過阿根廷喎。
如果要我求大俠評理，其實我都覺得德國佬踢得麻麻同真係幾夠運；不過運氣一直都係體育競賽嘅其中一個重要元素，英國佬嘈乜鬼吖，自己爭氣啲好過啦。
嘩！索呀！噚日《蘋果》頭版同埋體育版都落咗張南韓索女球迷不同角度嘅靚相。不過睇真啲，個靚女好似有喉核喎！唔通係另一個河利秀？我求大俠唔想，亦無機會驗證佢嘅性別，不過理鬼佢咩人，乜嘢人都有權睇波啫。波喎，個個都啱睇啦。
尼日利亞總統奧巴桑喬早幾日好有心咁設宴慰勞班世界盃國腳，結果無國腳出席，相信總統先生實好無癮。聽講班球員放總統飛機，係因為無收過獎金喎。計我話，錢係重要，但代表國家出賽同埋得到總統接見都係光榮嘅事，班國腳真係幫唔落喎，咁冇愛國心，唔怪得喺世界盃打到一「劈」嘢啦。
國際足協班專家經過研究後，早兩日發表咗球員受傷增加原因嘅報告，我以為係咩特別分析，原來又係齋講球員比賽太多；查實呢個理論連我求大俠在內都唔知講過幾多百次，班專家應該先知先覺，睇嚟國際足協養成棚人都係嘥米飯囉。
話說有個賊響禮拜二走入柏林一間銀行，趁德國對南韓場波完場時刻打劫。據講，由於銀行成棚人當時出咗門外睇直播兼準備慶祝，剩番少數職員，結果個賊得手兼成功逃走。個賊咁識利用千載難逢時機，當中過程簡直可以拍成電影。不過我求大俠向大家鄭重聲明，作奸犯科嘅事千祈咪學，否則恨錯難返。