二人男子組合Shine、余文樂和何韻詩等人，昨日相約在九龍灣打籃球練波，備戰稍後商台舉行的籃球賽。余文樂和Shine的徐天佑球技較精湛；而何韻詩則表示會用美色分散對手的注意力。
盧巧音前男友余文樂、二人男子組合Shine、何韻詩、李蘢怡（Tiffany）、鄧健泓、商台DJ森美和小儀等人，昨日在九龍灣室內運動場打籃球練波兩小時，預備於九月三日商台舉行的「903AllStars季後賽」一展身手。
商台DJ森美說：「我哋喺度為遲啲商台籃球賽練習，我哋重會有強勁陣容，大家到時留意就知。」據悉台灣人氣歌手周杰倫亦會落場，他一向酷愛打籃球，所以到時必有一番龍爭虎鬥。
Tiffany和何韻詩兩位女將的球技則麻麻，何韻詩更拿着籃球揼向其他人，她笑說：「大家有所不知，我打波真係好叻，但係我唔會出手，因為我比個波重靚，天生麗質，所以我落場主要係用美色分散對手的注意力。」
昨日余文樂和Shine成員之一的徐天佑球技最佳，余文樂更兩度走籃入波，但遠射則失利。余文樂說：「我有六、七年嘅打波經驗，不過𠵱家比較忙，少咗練波，球技都好似差咗。」問余文樂打籃球的難忘經歷，他說：「我中學時曾經係學界代表，重去過福建打波。」
而Shine成員徐天佑曾是母校聖公會聖三一堂中學的籃球校隊隊長，他說：「我覺得以前打得好啲，記得有一次我落場打，打到右手手腕嘅骨都裂埋。」
採訪：比華利
攝影：黃文成