長追亞洲盤回報不高
捧德國選前鋒「首球」

一連兩日會同大家睇番決賽兩支隊伍，喺今屆賽事嘅幾項主要賭盤表現。德國隊雖然順利率先打入決賽，不過原來長捧佢哋亞洲盤係冇乜肉食，重要喺臨場揀正佢哋低水嗰陣出手最啱。

水位低亞洲盤可出擊
要睇德國隊今屆賽事亞洲盤盤路，建議剔除第一場對沙地阿拉伯嘅戰果，因為沙地實力上比起德國起碼差上一班，成績難作準，亦難起參考作用。而由分組賽第二場對愛爾蘭，一直去到準決賽勝南韓，德國隊每每贏波贏盤時，都係處於極低水位，其中更有兩場只能贏半個盤，可見玩德國嘅亞洲盤，定要以「密食當三番」為原則；水位愈低愈多人捧場，是為最佳出擊時機。不過以平注計，埋單計數今屆捧足德國隊六場賽事，總回報只有兩倍半，抵唔抵玩就見仁見智嘞。

半/全場未嘗「輸」
眾所周知，德國今屆勝在夠穩，從近三場均以一比○淘汰對手可見一斑，而該隊上半場往往都顯得「交投淡靜」，令到半場和局的情況出現得最多。另外，德國隊至今從未試過喺返入更衣室嘅時候，係處於落後對手嘅情況之下；以此推論，要玩佢哋半/全場盤，起碼可以飛走佢哋「輸」嗰五瓣。

「首球」盤正路穩陣
德國隊似乎幾旺「首名入球球員」盤，六場比賽嘅首名入球球員，全部由德國球員包辦。不過個規律就好似佢哋踢法咁，比較正路及穩陣；除咗中場波勒近兩場都替球隊一箭定江山之外，其餘四場入第一球嘅都係前鋒，分頭唔多。而且波勒要喺決賽停賽，如果想敲德國隊入第一球嘅球員，睇嚟都係要繼續熱捧佢哋嘅前鋒。