美股真係禍不單行，之前安然事件，可以賴公司屬唔係好正經做生意嗰類，但連WorldCom呢類正經做生意嘅公司，盤數都係咁胡塗，咁就好難唔令投資者對美國企業會計帳目失去信心，資金加速流出美股在所難免。睇見咁嘅形勢，趙飛雲嘅低吸大計梗係要押後。
港股噚日以裂口跌穿10400大型橫行區底部支持位，其實係一個相當壞嘅訊號，加上成交急增至102億元，反映大部份人睇淡後市。不過，噚日美股期指全面急跌，標普500跌逾20點（相當於杜指跌200點），恒指可能已預先反映美股噚晚跌勢，假如美股跌幅收窄，恒指今日或有反彈，重返10400支持位之上，技術大超賣係支持港股反彈最有力嘅因素。
雖然趙飛雲仍希望恒指10400可以守得住，但配合現有嘅內外因素分析，噚日低位10291，恐怕未必係今年低位，估計恒指就算今日重返10400之上，但裂口阻力10493未必升得穿，須提防彈完之後再散過。如果美股繼續大散，恒指短期下試9700至10000水平，並非奇事。趙飛雲唔打算造淡，目前等港股確認見底買貨，並打算候低位買些少新地（016）長揸。
趙飛雲