個市噚日跌成咁，小初真係冇晒心機，就連諗住作長揸嘅唯冠國際（334）都遭到洗倉勁跌，小初想話止蝕走人都趕唔切，諗起荷包縮水就心傷。
如果個市再係咁跌，稍後長江生命科技同埋中銀香港上市，能否吸引到投資者落注，真係要兩睇。
一啲原本諗住做嘢嘅股仔，現時就更加唔知何去何從，好似早前小初提過嘅大陶精密科技（8041），供完股之後股價非常硬淨，反映貨源已收得七七八八。上周大陶公布完委任兩名新董事，今周就開始停牌。
聽經紀陳講，公司新人事新作風，近排搵到班大陸客參與，話會發行一批幾千萬元嘅可換股債券，畀佢哋玩吓。
原本有大陸客參與炒賣係好事，但家陣個市咁殘，特別係創業板股份表現咁差，睇嚟開車得唔多着時。
慕容小初