此文見報之日，世界盃決賽隊伍已有分曉，正路就係巴西對德國，大冷門就係土耳其對南韓。記憶上，巴西與德國從未在世界盃決賽碰頭，兩隊加埋攞過七次世界盃冠軍，居然從未互相比賽過，都算神奇。德國係世界盃最夠運（或者係最老謀深算嘅隊伍）。五四年爆大冷贏大熱門匈牙利，七四年反敗為勝，贏告魯夫領軍嘅荷蘭，九○年時十二碼贏英格蘭入決賽，再贏意大利，今屆冇咁好運可以打贏巴西啩？（如果德國輸咗畀南韓，入唔到決賽，可以氣數已盡咯。）
我哋希望決賽由巴西對德國，除咗憑實力估計外，亦係為餐飲生意着想，希望經濟得到好處。譬如中環鏞記大廈嘅KeeClub，喺五月三十日晚六時半開始，就招待會員，限額六十名，每位收一千二百五十元，幾貴噃。費用包括三小時飲酒（openbar）、晚飯、睇闊銀幕轉播決賽，幾過癮㗎；不過假如兩隊係南韓、土耳其，啲會員肯唔肯付出一千二百五十元去睇波兼食飯呢？蘭桂坊、中環、銅鑼灣啲西餐廳、酒吧點都希望巴西壓陣，增加決賽嘅吸引力！
今年可以講係香港轉播世界盃嘅黃金檔期，一來喺日本南韓打，晚上七時半係黃金時間；二來有中國參加，增強號召力。下屆二○○六年在德國舉行，中國隊多數入唔到圍（外圍賽點夠日本南韓砌呀！），二來轉播時間在深夜或凌晨，幾蝦人睇足一個月，所以下屆嘅轉播費，應該會平一啲！