經濟唔好，加上潮流興賭波，馬會雖然出盡法寶，但投注額仍萎縮，馬會員工難逃凍薪命運，接受馬會資助的慈善機構也要勒緊褲頭。為了開源，馬會總裁黃至剛卒之出到最後一招。
八方最近遇到一些馬會會員，佢哋個個都牙痛咁聲，原來收到馬會封信，話要加價。雖然佢哋都好叠水，但咁嘅時勢，乜都話減，你話加又真係好乞人憎。
話說馬會喺雙魚河有個鄉村俱樂部，個俱樂部有個特許計劃，以往年費三千蚊，來季加到六千蚊；而沙田會所亦有特許計劃，以往每年收三千七，一加就加到七千大元。
會員入會費方面更加「重手」，會籍一下子由十二萬幾加到二十五萬，足足一個開。馬會方面嘅解釋話，加價純粹為拉近同市價嘅距離，因為有會員反映，話馬會咁獨一無二，但會籍就同大陸一個普通高爾夫球會籍嘅價差唔多，香港其他會所都貴過佢幾倍。好似「美國會」一個公司會籍，市場叫價可能高達六十萬。
為咗彰顯馬會會員之尊貴，於是大幅加費。呢個理由，都虧黃至剛諗得出；如果要顯出馬會班高級職員個個叻過人，豈不是應該大幅加佢哋人工？
傳真︰2623-9278
電郵︰