邱達昌被迫捐146萬 - 李八方

  邱達昌被迫捐146萬 - 李八方

今年公益金籌得嘅善款唔夠數,不過,八方睇到一份上市公司公告,發覺喺證監會「協助」下,素有「慳家」美譽嘅「老虎仔」邱達昌(邱德根嘅公子)都捐出價值146萬元嘅股票畀公益金,公益金善款數字有機會回升。
「老虎仔」原先係一間叫做「慶屋國際」嘅上市公司嘅大股東,雖然佢將百分之二十九股份賣咗畀人,但證監認為「老虎仔」同新買家屬於一致行動人士,而且佢哋手上嘅股份合計逾三成股權。除非「老虎仔」將剩低嘅股份賣畀同佢自己及新買家絕無關係嘅第三者,否則就要提出全面收購。最後,「老虎仔」決定將餘下嘅六百多萬股「慶屋」捐晒畀公益金,呢批股票市值都有140多萬元。八方相信公益金應該多謝證監會!


傳真︰2623-9278
電郵︰[email protected]