八十一歲的陳伯，營營役役大半生，晚年只剩一身病痛。他既有心臟病，又曾中風，去年更不幸患上初期老年癡呆症，失去自我照顧能力，近日惟有申請居於內地的妻子來港照顧，惜夫婦目前只能靠一份綜援金生活，難以餬口，有待援手。
陳伯將掛在牆上的月曆塗得「花花碌碌」，一圈一圈的幾乎畫滿他各種病症的覆診日期。「人老咗冇用囉，周身病痛，好多嘢都唔記得。」兩鬢斑白的陳伯搖頭歎息道。
年紀老邁的陳伯，百病纏身，罹患心臟病、胃潰瘍、哮喘病，又曾輕微中風，去年更被醫生證實患上初期老年癡呆症。「佢試過兩次去街市買餸蕩失路唔識返屋企，問佢電話、地址，有時都講唔出，你話我點放心佢一個人喺度吖。」陳伯的妻子阿玲說。
記者乍看陳伯和阿玲，委實難以想像他們是夫妻，因為兩人的年齡相差甚遠，很奇怪何以能譜出一段愛曲。三十二歲的阿玲不諱言：「我承認當初係因為報恩，所以嫁畀佢，但相處耐咗，就真係培養出真感情，況且佢年紀咁大，又孤零零一個人，我唔忍心丟低佢。」
孑然一身的陳伯，當年因為無兒無女，在親友介紹下，認識了內地貧困戶的阿玲，並收為養女。「我媽媽好早就過咗身，屋企五兄弟姊妹，靠爸爸出城打工養大，但屋企好窮，所以我一路都好感激陳伯，佢畀錢我讀書，我先有機會讀到高中畢業。」阿玲向記者細訴陳伯對她的恩惠。
直至五年前，陳伯的身體轉差，被迫辭去倉務員一職，孤苦無依的他返回內地投靠阿玲，兩人並於去年正式註冊結婚。「其實我哋喺國內嘅生活都好困難，我喺士多做店員，每個月收入得六百元，陳伯病痛又愈來愈多，成日都要問人借錢睇醫生，所以我決定帶佢返嚟香港。」
陳伯回港後，去年獲社署發放傷殘津貼及綜援金，生活問題暫時得到解決，惟持雙程證來港照顧丈夫的阿玲，生活費全無着落。「我本來想安排陳伯入老人院，咁我就可以安心返上去，亦唔使咁重負擔，但佢點都唔肯，嗌生嗌死，社工都冇符。」眉頭深鎖的阿玲表示，刻下已走到山窮水盡的地步，只剩下數十元，彷徨不已。
有見阿玲的困境，蘋果日報慈善基金即時撥款五千元，解其燃眉之急。
捐款編號：C608
暖流熱線
電話：29908688
傳真：23702192
電郵：
網址：