【記者汪正文北京直擊】冠希（Edison）胞姊陳見飛噚日喺北京釣魚台國賓館，舉行「世紀元素娛樂有限公司」簽約儀式，陳見飛嘅爸爸陳澤民、媽咪、大家姐Olivia同細佬Edison全家都專登嚟撐場。
喺簽約儀式進行嘅時候，陳見飛頭頂附近嘅射燈燈泡突然爆咗，重因為燈泡嘅熱力，令到消防花灑忽然灑水，啲水灑咗幾十秒，情況都幾尷尬。Edison見到呢個情況，不忘取笑胞姊陳見飛，佢話：「你睇你，紅到爆燈！」
而陳見飛就話估計係因為燈泡太熱，搞到消防系統灑水，佢話：「我諗係因為盞射燈太熱。」陳見飛早前講過要簽約英皇娛樂，𠵱家又突然改變主意，佢解釋話：「因為爹哋同中信文化嘅李博倫係世交，我想發展內地巿場，所以咪簽佢哋，我啲唱片重會交畀英皇宣傳同發行。」陳見飛重話同Edison約法三章，大家暫時唔會合作，因為唔想俾人話借細佬做宣傳。
鍾楚紅丈夫朱家鼎喺中環開嘅家具舖，平日有唔少闊太幫襯，佢哋好多家具都係出自意大利名家設計，原來早排古天樂搬新居嗰陣，佢屋企大部份家具都係幫襯紅姑老公間舖頭，不過就唔係古仔自己親自落去買，佢只係搵咗個設計師同佢搞掂，聽講剩係家具都買咗成百萬，古仔又真係幾捨得。
製作人李國立噚日出席喺灣仔會展舉行嘅「香港國際影視展2002」，佢話自己拍嘅劇集《書劍恩仇錄》重未知賣畀無綫定亞視。問佢邊個台出價好啲，佢話亞視出價未必低過無綫，但會拖數，好似已經播完嘅《楊門女將之女兒當自強》，過咗成半年都未收到尾數，但佢話唔會採取法律行動，再同亞視傾吓先喎。
林建岳今年好熱衷搞娛樂事業，投入程度係一得閒就約埋佢老友王海峰一齊傾劇本，研究開戲計劃，如果計過條數冇乜錢賺嘅話，佢就唔會好似以前咁照開戲。以前啲電影人都唔信佢真係有心搞娛樂事業，以為佢玩玩吓，但最近同佢傾過合作嘅影人話佢都幾認真，對一部戲嘅成本、細節發展等都問得幾詳細。
邵氏製作部負責人黃家禧噚日喺會展同記者講張徹嘅身後事已經着手籌辦，老闆邵逸夫更落咗吩咐，要將個喪禮搞得好好睇睇，唔使理要用幾多錢，而張太𠵱家已經開始執拾張徹啲遺物，打算將所有佢生前有關電影嘅書、資料同獎都送晒畀電影資料館。
吳思遠噚日喺灣仔出席一個電影活動，佢大談謝霆鋒涉嫌串謀妨礙司法公正嘅案件。
吳思遠言語間力撐霆鋒，佢話：「我睇住佢長大，我覺得霆鋒已承受咗好大壓力，已經係一個教訓，希望大家可以畀多啲空間佢。藝人反叛先至適合做娛樂事業。」