農曆5月過了一半，港股終於大跌，正如大師話齋，今次係受外圍拖累，美國公司誠信問題令投資者信心大失，引發恐慌性拋售，全球股市都急挫。
筆者早幾日講過，美國公司盈警，有唔少係同之前做咗手腳嘅帳目有關，但好似WorldCom咁大劑，涉及嘅數目成38億美元，咁就神仙都難以打救。WorldCom成為Enron第2，重有幾多間，無法估計。
美股連續兩日單日轉向，周一掉頭升，周二掉頭跌，相信WorldCom事件有唔少人收到風，沽定先。噚日亞洲時段，美股繼續大散，杜指再跌多200點，而標普期指亦跌成26點，亞洲股市全面下跌，港股亦跌定先，恒指10387的支持位終於失守，跌落10291，創出今年新低，尾市有輕微反彈，收10355，仍大跌253點，成交急增至102億元，藍籌股成為大行同基金主力拋售嘅對象。
恒指跌穿重要支持，而跌市中成交又激增，顯示沽壓極大，除非短期內能重返10400之上，否則重會再跌。不過，由於大市已超賣，唔排除急插一次後短期到底，出現一次較大幅度的反彈。
噚日14RSI22.4，再創今次跌市新低；但9RSI17.45，仍在背馳階段（上次低位14.3），但現時跌勢未止，待背馳正式確認後才入市，較為安全。
農曆5月開始，股市大跌，已應驗；而要經過一次震撼性的急挫，才會到底，係噚日？今日？抑或7月4日？同一位對術數有研究嘅朋友傾開，佢話今年股市最差係農曆5月及6月，但在5月20日之後，情況會略為轉穩，而6月嘅氣氛亦唔會咁恐怖。不過，今年11月亦係一個唔好嘅月份，要小心！
大市若然到底，博反彈，首選係大藍籌，嚴重超賣的長實（001）、和黃（013），以及仍呈背馳的滙豐（005）同太古A（019），都可優先考慮。
郭兆誠