長實紅磡摩天大廈海名軒，響內地傳媒頻頻報道下，吸引好多當地知名人士慕名而嚟。置業國際好幫手，噚日安排幾十名深圳廣州發展商去現場參觀，包括深圳上市公司藍江房地產同萬科集團。講起萬科，原本做開實業，其後轉型主力發展房地產，相當成功，該公司重係深圳上市公司。董事長王石，曾當選由全國媒體聯合舉辦中國房地產嘅十大風雲人物。
上海靜安出年來港舉行樓盤展銷會，今日先開記者會，講解當地房地產市況，加深大家嘅認識，引起大家嘅興趣。至於深圳新世界投資發展，今日響深圳為福田新世界中心商廈舉行建築設計評選。
世邦魏理仕嘅資產管理服務部，啱啱攞到專為服務行業而設嘅ISO9001/2000品質管理系統認證，內容包括質量政策和質量管理等程序。例如保安、清潔、維修、租務同財務等方面，都會有既定程序跟從，目的當然係進一步提高公司嘅競爭力。
蘭西收到風，利記新界分區經理張木貴粉墨登場，演出集團內部短片。據講，片長10分鐘，由主角到剪片，都由員工負責，但短片只畀主管級員工睇，套片亦會響7月主管例會中播放。至於拍攝短片嘅目的，主要係探討地產代理經常面對嘅問題。
蘭西