中華城市燃氣（603）差啲搞唔掂大陸燃氣項目一役之後，小初重以為和黃（013）唔敢再亂認購二三線股嘅可換股債券，點知噚日佢又認購軟庫（648）嘅可換股債券。唔知今次和黃點石成金嘅效應，會否再在軟庫出現呢？
經紀陳問小初覺唔覺得成單deal嘅結構，跟辰達永安（1189）、中華城市燃氣，同埋百江燃氣（8132）好相似，恍若見到殼王嘅手影？佢重話今次軟庫與和黃扯上關係，唔排除係殼王玉成嘅好事。
無論係唔係都好，軟庫自科技股泡沫爆破後，股價都殘咗好耐，今次借助和黃嘅大名，相信會有一定刺激。
至於會唔會好似上面講過嗰一批股份，炒到飛沙走石，小初唔敢亂猜，皆因家陣市況真係麻麻地，尤其係嗰批股份早排受中華城市燃氣急跌拖累，股價全部由高位插水落嚟，唔少投資者尚存陰影。
慕容小初