吳鎮宇、葉璇同無綫藝員黃宗澤、陳健鋒、馬國明同吳卓羲等人，日前去咗日本拍無綫新劇《衝上雲霄》，由於呢套劇嘅演員都好年輕，大家相處都好愉快。
吳鎮宇重因利乘便，去咗浸溫泉，佢重話好享受。而黃宗澤、陳健鋒、馬國明同吳卓羲四位年輕人演機師，佢哋更俾工作人員封佢哋做「港版F4」。
而葉璇就飾演女機師，佢噚日喺電話度話：「呢次去日本拍外景，劇情講我要搵番親生老竇，咁啱我同佢哋四個男仔接受完機師訓練，佢哋咪陪我一齊去日本尋親囉！」
何韻詩噚日去商台接受訪問，阿詩最近忙緊為八月出嘅新碟作曲，佢希望講吓自己嘅感情生活，講到感情，佢就話：「𠵱家重係孤家寡人。」問阿詩劉浩龍係咪佢男友，佢否認，只係話：「喺大半年前，有過一段電話情緣，雖然大家都有感覺，但係只係維持咗一陣。」問阿詩對方係咪圈中人？佢話：「我識嘅朋友大部份都係呢行啲人，你哋自己估啦！」
梅艷芳日前喺三藩市為佢嘅「極夢幻巡迴演唱會」進行最後一站演出，嗰日阿梅施展佢嘅舞台魅力，大唱多首經典名曲，加上佢所着嘅性感服裝，令觀眾睇得如癡如醉。而阿梅更獲加州州長頒發「傑出慈善藝人」榮譽，而奧克蘭市長更定三月二十三日為「梅艷芳日」。
馮仁昭早兩日行過銅鑼灣崇光百貨，有人派緊宣傳單張，話嚟緊禮拜日（三十日）喺香港大球場有嘉年華會，重會有場慈善足球明星賽，球員名單上面竟然有關之琳同梁詠琪。馮仁昭心諗呢兩位靚女唔係會落場踢波咁搞笑吖嘛，於是打電話去問，先知佢哋只係做啦啦隊，差啲俾張單張呃到。
最近有口痕友同馮仁昭講，話連續幾部劇都演皇帝嘅江華，唔知係咪扮皇帝扮到上咗身，就算唔係拍緊劇，佢都鍾意人哋同佢敬禮。而且每次入廠開工，佢明明早到，都硬係要等到全世界人入晒廠，佢先至入去，十足十啲大人物壓軸出場咁，遲吓佢喺新劇《朕到未來》又做皇帝，口痕友話諗起就怕怕。
韓國當紅男星李秉憲噚日喺台北出席佢拍嘅電影《JSA安全地帶》記者會，記者叫佢影相時，佢就企喺宣傳板前面，但因為個大型宣傳板係活動嘅，所以佢想挨落去嗰陣，失咗重心，差啲跌落地。馮仁昭勸喻啲藝人，真係要小心，咪好似陳奕迅上次喺台灣咁整傷下體。
小雪上個月去咗加拿大幫無綫拍旅遊特輯，順便拍埋廣告㖭！小雪重試玩滑雪，但係由於佢第一次滑，所以唔係好識，重跌咗二十幾次，好彩冇受傷。
除咗滑雪之外，導演重挑戰小雪嘅膽量，叫畏高嘅小雪行吊橋，嚇到佢半死。
黃貫中（Paul）同王喜噚日去商台接受訪問，八月中佢兩個會去尼泊爾旅行兼探訪當地孤兒院。王喜話因為阿Paul幫佢做緊隻EP，傾開原來大家都未去過尼泊爾，又想做啲有意義嘅嘢，所以約埋一齊去。阿Paul又話女友朱茵都好想去，但係冇期。佢哋搞個團名額有三十個，先到先得，團費五千幾蚊喎。