上星期五英巴大戰之日，本是高官問責制之下，新官名單宣佈之時，全世界記者都知道星期五上午到禮賓府採訪，香港電台負責播映，無綫電視預備直播。點知星期四晚，政府就通知傳媒，押後公佈名單，據知某些人有技術問題喎，其一係馬時亨護照問題，脫離加拿大籍要搞六個月起碼，以前陳偉業就曾經此苦；其二係何志平做民政事務局局長，有好多人反對，嘈到上北京；廖秀冬亦被指曾與煙草公司有關連。點解啲人唔早啲反對呢？皆因人選保密，大家唔知，到知道嗰陣，已經冇乜時間咯。
成語有講，無官一身輕，上星期五正當特首高官為名單煩惱之際，大把人雲集九龍展貿中心睇有線電視直播英巴大戰，昔日自由黨主席李鵬飛身穿巴西球衣，笑容滿面，與朋友既講波，又講問責制，都唔知幾happy。如飛哥者，今日處於超然地位，既搵真銀，又有影響力，兼且全無自由黨及政治上嘅煩惱，可謂係人上人。有陣時，只要睇得開，跳出圈外，放棄一啲自以為重要，實則係苦惱來源嘅俗務，人就會開心好多，唔信嘅話，可以睇吓飛哥。
不過有人辭官歸故里，有人漏夜趕官場，新官究竟為人民服務吖，還是自尋煩惱，日後自有分曉。照計李國章與何志平並非和稀泥人物，兩人做高官，啲公務員有排「文化震盪」。