南韓在今屆世界盃有優異表現，帶挈紅魔鬼產品風靡整個亞洲。除咗BeTheReds紅色T-shirt喺韓日熱賣外，香港及中國旅行團，嚟到南韓旅遊都會向印有BeTheReds嘅產品瘋狂掃貨。
喺南韓已經賣出超過一千二百萬件嘅紅魔T-shirt，平均每四個韓國人就擁有一件，至於價錢就由一般四十至七十蚊港紙不等，視乎質素而定。不過，由於南韓已打入最後四強，當地生產商睇準呢個賺錢商機，紛紛將自己嘅產品都加上BeTheReds標誌，實行趕喺最後呢幾日賽事搵快錢。
就小記所見，喺市面發售嘅紅魔鬼產品，最受歡迎除咗T-shirt外，其次順序包括有頭巾、短襪、女裝背心、小童套裝及連身裙、喼帽及背囊。呢類產品發售地點主要在漢城東大門一帶，由於嗰度係旅客購物區，香港及中國旅行團喺世界盃期間嚟到，都會大量入貨。
雖然日本已經喺世界盃出局，但呢個即將舉行決賽嘅國家，部份商人亦引入南韓紅魔鬼T-shirt喺係日本發售，不過，價錢就比南韓貴一倍有多，大約為港紙一百二十蚊。