新局長出台，據說廖秀冬最有人緣：八方上個禮拜寫過佢嘅公司同佢嘅拍檔。當時有啲資料未肯定，近日收到新料，再同大家分享。
提起廖局長，大家都知佢係蕭炯柱前妻，但佢現時嘅感情生活就冇人講，真令八方好奇。照計咁有魅力的女人冇理由冇人追。於是四圍去「八」，發現局長背後有兩個男人。
第一個係廖約克，哈佛博士中大教授，後來與同事張樹成一齊創業做液晶體，公司叫「精電」，重上埋市。不過，佢剛在上周五辭去精電董事職務，似另有發展。廖秀冬係佢個妹。
第二個係黃賢，佢係哈佛法學院高材生，七十年代學成返港加入一間Ｂ字頭大律師樓，傑作之一就係「和記清盤案」。七九年中國開放，黃賢以外貿法專家身份到北大教書，並協助內地搞法律改革，聽聞胡耀邦都好重視佢嘅研究，指示幹部學習。點知，兩年之後北京竟然話黃賢盜竊國家機密，影印咗一批文件帶來香港收藏在坪洲媽媽家中（黃媽媽亦係八方同行）。結果，八三年被控間諜罪判刑十五年，當時有人估計係因黃賢在紐約，同前市長林賽一齊搞律師樓，引起懷疑。
一腔愛國心換來十年冤獄，直至九三年才假釋，四年前最高人民法院宣布單案搞錯咗，為黃賢平反；但乜都補唔番。現時，黃賢係「中文計算中心」及Eikometric兩公司股東，廖秀冬在兩公司亦有股份。
黃賢同廖約克都係第一代老保釣，論資格老過陳毓祥，黃賢可能因為咁識埋廖約克個妹，廖秀冬亦可能在佢哋身上沾染咗一啲愛國情操。聽知情嘅朋友講，黃賢非常叻，的確係人才。佢同廖秀冬關係，除咗生意夥伴外，重係「好朋友」。
傳真︰2623-9278
電郵︰