港股噚日表現牛皮，收市報10608，跌48點，成交61.13億元。午後港股顯著下跌，主要因為聯通（762）及和黃（013）遭拋售。
和黃下挫因歐資又出現一輪減持電訊股浪潮，德國電訊及Vodafone股價都大幅下挫，而聯通則因CDMA手機減價浪潮將席捲全國。
港府噚日突然宣布將第4條過海鐵路批予九鐵發展，即地鐵（066）落敗，不過政府同時宣布，短期唔會發售第2批地鐵股份，及研究將兩鐵合併，反映港府仍有心托住地鐵股價，當係向外資有個交代。
不過，日後地鐵仍會面對唔少不明朗因素，併購九鐵其實不知是禍是福，日後地產收益將被政府限制，甚至被奪去，將令地鐵盈利大降，可能會引起一輪拋售潮。
市場有消息傳出，金衛醫療（8180）管理層將到英倫進行環球推介，希望可以搵多一兩個基金入股。雖然成敗未知，但股價噚日就已經有反應，收報2.275元，升3.4％，惟成交不多。
此股去年底以每股0.88元定價招股上市，至今已累積升幅1.58倍，但成交一向唔多，屬乾升一族。至於可否令歐資基金高價入股，真係一個好大疑問。不過下周長江生命科技就會招股上市，到時生化股可能會借勢大升，最適合配股集資。
黑客話，生命科技（1180）聽講已完成收集，近日股價重上5月中配售價0.29元，噚日收報0.305元，升1.7%，可能會隨時開車。
阿虎