每次南韓比賽總會有過十萬球迷聚集嘅漢城光化門，政府為咗解決各球迷嘅生理需要，都會將大量臨時洗手間運去市政廳同光化門一帶；不過，由於球迷人數實在太多，所以球迷使用時都無分男女，有得解決最重要。
南韓政府喺周二宣布，帶領南韓國家隊歷史首次打入世界盃四強嘅荷蘭籍教練軒迪克，將會成為南韓首個獲頒贈榮譽市民嘅外國人。軒迪克帶領南韓先後打敗葡萄牙、意大利同西班牙，即時做咗南韓英雄，呢個獎抵畀軒迪克。
南韓喺今屆世界盃決賽周嘅神奇之旅，到咗噚晚輸咗畀德國，算係完咗嘞；而喺漢城世界盃運動場睇波嘅六萬幾南韓球迷，大部份都冇話因輸波而情緒好激動，反而全體起立向球員鼓掌致敬，呢種風度認真難得。