美股周二走勢好似過山車，趙飛雲睇到眼花，杜指最後升28點，納指則升1.3%，仍係反覆尋底嘅格局，所以對港股噚日走勢冇幫助，恒指走勢牛皮偏軟，市況完全唔似期指將近結算，最後跌48點，收10608。
噚日香港陽光普照熱到暈，但股市則陰陰濕濕如墮五里霧中，令人好難睇清前景。由基本因素睇，現時至7月初嘅利淡消息唔少，先講本地，80億元盈富基金（2800）7月2日開始推售，長江生命科技及中銀亦跟住進行招股，三個項目估計抽水約300億元，除非有大量新水湧入，否則難免對大市造成壓力。其中中銀招股可能對恒生（011）、東亞（023）等本地業務為主嘅銀行，出現換馬效應。
外圍方面，美國經濟復甦速度似乎追唔上市場預期，美元弱勢加速，資金流出美股及美債，情況惹人關注，再加上南美洲阿根廷、巴西等潛在金融問題。綜合而言，港股有可能跌埋7月初，至7月中再展升浪。
藍籌股中，以地產股情況稍好，新地（016）噚日重返10日線（現處59元）之上，收59.25元，短期如守穩58元之上，則有望完成尋底，新地Call輪可望多兩眼。
趙飛雲