真係服咗塞內加爾前鋒迪奧夫，佢可以加盟英超勁旅利物浦已經係唔少球員嘅夢想，轉會費重要成一千萬鎊（約一億一千六百萬港元），簡直係巨星之列；二十一歲仔有咁嘅成就都咪話唔巴閉。點知佢重唔心足，話利物浦領隊侯利亞淨係畀佢唞二十一日，就要佢到英格蘭報到唔夠喎；佢重話踢完世界盃之後已經身心俱疲，想要多啲時間遠離足球。
其實，計我求大俠認為，迪奧夫喺世界盃都冇乜點博過啫，有二十一日唞重唔夠？我求大俠真係要苦口婆心咁同佢講句：後生仔，唔辛苦邊得世間財呢？盡快去適應英式足球同埋學好啲英語，對自己喺英超一炮而紅肯定有幫助，除非佢去利記係想呃飯食啦！
啱啱展開嘅溫布頓網球公開賽不愧為最傳統嘅網球賽，雖然呢個賽事嘅賽期，有幾日叠咗世界盃；不過佢地嘅籌委就話唔會好似之前嘅法國公開賽咁，安排電視播世界盃賽事，佢地重話就算落雨打唔到波時，亦都唔會播，認真有性格。
南韓新聞人物安貞煥又有最新消息，意甲聯球隊佩魯賈宣布已經同佢簽咗約，點解佩魯賈會轉軚？據聞係因為錢作怪，佩魯賈見安貞煥咁搶手，諗住簽咗佢之後再轉會賣畀其他歐洲球會嚟賺錢；如果賣唔出就擺佢喺度，唔畀佢出場，如果係真，呢招都算絕囉。
講開南韓，佢哋嘅荷蘭籍教練軒迪克認真魅力沒法擋，由於佢嘅關係，令荷蘭公司嘅出品喺南韓都大受歡迎；其中喜力啤就最受惠，因為喜力嘅韓文發音同軒迪克近似，搞到好多南韓人淨係叫呢隻啤酒飲，喺世界盃展開到𠵱家，銷量急升十五個巴仙，發達囉。
問意大利球迷最憎邊個？肯定成棚人會話係響南韓對意大利場波執法嘅厄瓜多爾球證摩蘭奴。最近就有意大利球迷搞咗個網上飛靶遊戲，攞嚟出吓氣，鏢靶當然係摩蘭奴啦，認真搞嘢，但細路仔唔好玩。網址係