中國國務院為穩定股市，突然將國有股減持方案叫停，自此方案推出接近1年以來，內地AB股已下跌3成及4成。消息宣布後，不明朗因素消除，內地股市亦大幅反彈，升幅接近10%。
A股急彈，H股亦有表現，但個別發展趨勢好明顯，「成份」不同，表現互異。一直由大陸資金主力持有的H股，反應亦最敏銳，而外資基金揸得最重的大型H股，反應只屬一般。
中外投資者對叫停減持國有股有不同看法，大陸資金有如「久旱逢甘露」，外資基金則以長線為主。
大陸資金一路揸重嘅H股，其實大家都耳熟能詳，好似鋼鐵股中的重慶鋼鐵（1053）和馬鋼（323），噚日升幅就有14.1%和10.9%，而哈爾濱動力（1133）同一拖（038），亦分別升14.6%同11.6%，東方電機（1072）亦有8%進帳。鋼鐵股中的鞍鋼（347），由於兼具中外資金的「成份」，因此其升幅亦較遜色，只得8.8%。
至於基金股，相對之下，就好令人失望。兩隻大價股，華能國際（902）同兗州煤業（1171）都逆市而跌5仙，而北京大唐（991）亦僅得1個位進帳。
上海石化（338）係大摩嘅愛股，但都係收1.19元，升3仙而已。
同大陸「芬佬」傾開，佢話𠵱家好明顯係政策市，AB股噚日急升，可視為長期跌市後的一次技術性反彈，是否扭轉跌勢而開展新升浪，仍須觀察。
來港已多時的大陸資金，相信不會因此而北調，不過，由於內地股市有起色，北水南調的速度，暫時亦會放緩。
大市噚日低開，恒指最低僅10509，跌幅比預期小，其後更穩步回升，收報10657，升65點。大市正醞釀反彈，初步目標為10日線，升越後可加碼看好。
郭兆誠