董特首噚日公布問責局長名單，根據過往經驗，董特首凡有大動作，港股都會大跌一輪，效應足可媲美秋官。不過，港股噚日唔單止唔跌，重反升65點，收報10657，可能係反映董特首衰運已過，及有北大人發功相助。國務院噚日表示，唔會透過第二市場減持國有股，令中資投資者信心大增，H股全面上升，同時亦改善藍籌股投資氣氛。
上周傳出有大戶力吸中國聯通（762）博反彈，果然噚日俾佢哋博到。聯通母公司話會調低CDMA租賃費，分析員可能會調高聯通嘅盈利預測，所以噚日有一班空軍平倉離場。
鼎康御泰主席陳孝聰近期頻頻入股香港上市公司，唔通想同殼王陳國強爭一日之長短？陳孝聰已先後購入萬信集團（555）及御泰國際（155，前稱光通數網），噚日重申報持有意科控股（943）近1.6億股。
以佢嘅台資證券業背景，入股萬信集團其實唔出奇，佢重話會斥資2至4億元，買多一兩間類似萬信規模嘅證券行，並將金融證券業務注入御泰，成為集團在港上市旗艦，但點解要買夠三間上市公司就令人費解。黑客話，據講佢持有意科都係無心插柳，投資者毋須過份敏感，至於呢支柳會種成點？就連佢都唔多清楚。
首長科技（521）噚日升18％，收0.72元。據聞已升近配股價水平，不過消息話可能要喺高位搓多一輪，先至會配股集資，免得俾人話佢夾硬抽高配股咁肉酸。
阿 虎