德國及南韓嘅比賽都唔多入球，令到今日呢場準決賽個「入球上盤」分頭幾吸引，鍾意博反底嘅朋友可以一敲。此外，今場好大機會德國隊由頭贏到落尾，半/全場開「A/A」呼聲最高。文：華度
今場個「入球上/下盤」賠率有點異樣，事關「入球下盤」只得一點四倍，個分頭好少見會熱成咁。雖然兩隊今屆夾埋打咗十場，有九場都係開「入球下盤」；不過睇番佢哋喺決賽周前嘅熱身賽成績，原來都同樣係「交投暢旺」嘅球隊。南韓就曾經對法國輸二比三，之前亦大勝過蘇格蘭四比一；德國更不在話下，大勝奧地利六比二，以及慨贈科威特七隻光蛋。所以今場呢兩隊對碰，值唔值得博反底兼爆冷，開番個「入球上盤」呢？
德國隊今屆五場賽事入面，有三場都係半場已經領先對手；早前講過南韓半/全場盤路興「單跳」，照睇走勢該隊今仗半場應會落後；睇番南韓隊上仗對西班牙，上半場大部份時間都未見拼盡，留力到下半場至出擊。以上三點都構成呢場波半場應博德國贏嘅因素，至於全場，我心水係德國可以贏埋，呢鋪「A/A」應有計。
大熱嗰瓣係今場嘅德國搭聽日嘅巴西，由呢兩隊組成嘅「決賽孖寶」賠率不足兩倍，我就覺得如果真係咁穩，不如博佢哋嘅標準盤過關好過。事實上若果德國或巴西都未能在法定時間內淘汰對手，去到加時甚至互射十二碼階段其實都無咩優勢，要博佢哋入到決賽，就要博佢哋九十分鐘法定時間內KO對手。兩個標準盤分別有一點五及一點九倍，二串一有近三倍分頭，重抵玩過「決賽孖寶」，要自製呢條「過關」係時候嘞！
話我「擦鞋仔貼士」都要講，只有三點五倍嘅德國前鋒高路斯，真係好大機會射入（頂入？）今仗首個入球。雖然呢位靚仔前鋒近兩仗都無入球，不過以南韓球員嘅身高，相信都幾難頂得住德國隊嘅高空攻勢；而德國隊亦相信會覷準對手呢個弱點，咁樣擅頂頭槌嘅高路斯就好大機會先開紀錄，重係唔放心嘅可以拖埋波勒呢位後上頭槌攻門能力強嘅中場。