噚日南韓隊到漢城世界盃運動場練波，雖然唔畀球迷入場，都吸引咗八百個球迷喺場邊打氣，一次一架普通旅遊車直駛入場，班球迷立即走過去重大叫支持口號，不過當然嘥氣，因為南韓隊巴車身係畫滿圖案嘅。
到真命天子南韓隊巴入場，班球迷當然陷於瘋狂狀態，但現場就有幾十位警察維持秩序，將人群隔開；小記就發現幾個差大哥頻頻回頭望住隊巴，展露微笑，睇嚟佢哋都抵受不住南韓隊嘅魅力。
噚日操練期間，幾個日本女記者攞出私伙儍瓜機出嚟，頻頻追住南韓隊型仔安貞煥，拍低佢一舉一動；睇嚟安貞煥冇得喺歐洲落班，轉投J-league都冇問題。
南韓總統辦公室周一發表聲明，表示會將今年七月一日定為公眾假期，以慶祝該國喺今屆世盃取得空前佳績。同時計劃喺下月二日舉行全國慶典，以祝賀世盃主辦成功。
記者梁國威、李勇明漢城直擊