高官問責制落實，八方再睇番董家新班子之詳細資料，發現到兩個有趣嘅地方。
第一個係旺地，想做局長者一定要睇。話說馬己仙峽道五號嘅澄碧閣，呢幢有成三十年樓齡嘅豪宅，只有十二層二十四個單位，但住咗兩個局長，一個係保安局局長葉劉淑儀；一個係財經事務及庫務局局長馬時亨。其實呢幢樓重有唔少猛人，好似住在馬局長樓上、幫小甜甜打官司打到好唔得閒嘅超級大狀李柱銘以及住咗入去之後身體健康晒嘅大俠查良鏞，都係又有名又有利又有權又有地位之人，你話呢度幾好風水。
講開新局長馬時亨，佢九六年用三千二百八十萬買咗個三千三呎嘅單位，計落𠵱家都跌咗成千萬。不過，馬局長身家咁厚，一千萬濕濕碎，賣咗電盈股票都千幾萬，只要官運亨通，乜都抵番。
講完旺地，再講年份，不過唔係講紅酒，係講港大。港大最好年份係一九七三年，梁錦松、廖秀冬、馬時亨同埋葉澍堃一司三局長都係個年畢業。阿董內閣不過二十人，五分一係七三出品，咪話唔巴閉。
除咗高官之外，嗰一年畢業嘅港大猛人重有恒基地產副主席林高演、《經濟日報》社長麥華章、恒生副行政總裁陸觀豪、大導演張婉婷、科大工學院前院長高秉強、財經名嘴陳永陸……要數有排都數唔晒。
傳真︰2623-9278
電郵︰