文:肥師奶
比目魚肉質堅實
我啲仔女都鍾意食煎炸食品,貪佢夠香口。雖然我自己鍾意食清清哋嘅清蒸魚,但有時都會就佢哋嘅口味,煎魚做餸。而講到煎魚,我就鍾意買比目魚嚟煎,因為佢肉質比較堅實,煎起唔易散,又無一般急凍海鮮嘅腥味,而且𠵱家比早前平咗四蚊一磅,較為經濟。
約$28/磅
各大凍肉舖有售
新西蘭富有柿爽又甜
食柿最怕係食到澀柿,食富有柿就好少有呢個問題出現,所以咁多種柿之中,我最鍾意食富有柿。
最近吉之島推出一款新西蘭富有柿,品質相當唔錯,爽口之餘,食味重相當甜,連皮食埋都唔覺有澀味,七蚊個雖然略貴啲,但我相信食過都會覺得物有所值,所謂一分錢一分貨,買個試試無妨,我肥師奶無介紹錯㗎!
$7個
吉之島有售
清潔海綿毋須加清潔劑
平日清潔嘅時候都要落好多嘅清潔劑,一來麻煩,二來有陣清潔劑味道。不過俾我肥師奶搵到呢隻叫「激落君」嘅清潔海綿,只要將佢濕水,就唔需要另外加清潔劑,可以去油迹、茶迹、頑固污迹。而由於無加清潔劑,可以用嘅範圍重好多,好似汽車、電器、家具,甚至係波鞋,最啱我啲仔女用,都幾方便又環保。
$10/包(細裝)
$39/包(大裝)
銷售點:吉之島、千色店