趙飛雲本來對政治冷感，但近排問責制新聞多多，所以噚日亦睇電視直播董特首公布問責制官員名單。趙飛雲對問責制唔敢抱太大期望，但就希望中央「媽媽無所求，只為兒成才」嘅心態永遠持續下去。
其實中央都算鼎力支持董特首，留番噚日先公布停止減持國有股措施，配合中移動（941）公布本年度會派息，聯通（762）母公司宣布減低聯通CDMA網絡租賃費18%等，可算用心良苦，港股噚日能夠倒升65點，後面可能有好多人心血。
不過，由技術因素睇，港股已經大超賣，加埋上周五美股急跌後，噚日外圍美股期指反彈幅度唔細，唔排除今日會食住個勢再抽高些少，短期反彈阻力10800—10880，由於外圍利淡消息多，升唔穿反覆試底機會大，所以現水平唔需要心急追貨，候回頭考驗10400至10600守穩再考慮入市。
藍籌股暫時不宜手多多，但二三線方面不妨留意吓信德（242），香港要做「清潔城市」，澳門自然受惠，加上計劃發展新航線連接本港及深圳機場，里昂估佢航運業務方面有2成增長。股價守住長期升軌1.40元則升勢未破壞，可伺機吸納，短炒以1.33元止蝕。
趙飛雲