新地馬灣珀麗灣係下半年重頭戲，由雷霆擔大旗，所以雷生都好緊張，不斷為樓盤造勢，下個禮拜五，雷生重會出席美聯物業幾個月一次嘅「全民大會」，上台講吓珀麗灣。呢個「全民大會」響九龍灣展貿中心舉行，到時美聯公司上下2000多人都會出席。美聯張錦成話，公司會做定促銷珀麗灣嘅「秘笈」同光碟，臨場派畀同事，佢重話歡迎傳媒去採訪。
從第一太平過檔華置行唔夠半年嘅馬大炘，最近宣布自行創業，與兩個合作多年嘅拍檔，成立「天地國際餐飲業租售有限公司」，睇間公司名就知道係做乜嘢業務。馬生話現時重有揸住啲華置行股份。
美聯物業市場及企業傳訊部經理劉仲良即將離職，聽講係個人理由，而佢個位將由杜輝接替，今日上任。杜輝曾在傳媒工作過一段長時間，4年前都響美聯做過，今次回巢肯定駕輕就熟。聽講美聯市場及企業傳訊部重會繼續請人，實行大事擴張。
香港興業向嘉里建設買入嘅上海嘉里華庭第二座，共有118個住宅，會作出租用途，本港傳媒重獲邀實地參觀新落成嘅示範單位。
上海樓市熱潮南下到香港，所以本港不時都見有關於上海房地產市道嘅講座，瑞安集團同渣打銀行響上周六同日，搞咗「上海經濟與房地產投資」講座，內容關於上海經濟同房地產發展狀況、未來趨勢、投資環境同機遇。講者有渣打郭國全同瑞安鄭喜明等。
中原地產一連3個月都錄得超過1億元佣金收入，老闆宣布，所有後勤員工都獲發四分一個月糧做花紅。
蘭西