郭可盈最近拍咗個內地沐浴露廣告，要喺一個鋪滿花瓣嘅水池度拍攝，認真好享受。
可盈話：「我拍緊嘅時候有男女同浴嘅感覺，雖然只得我一個人浸喺水池度拍，但之前有工作人員做準備，佢哋都有留過喺水池度，所以我咪有呢種感覺。」
可盈話呢次拍廣告除咗浸水池，佢嘅大露背演出亦係入行以來最性感嘅一次，可盈話：「本來導演冇叫我露背，但我覺得拍沐浴露都要展示身體線條美，所以我主動提出，好彩拍出嚟嘅效果都好好。」可盈為咗呢個廣告，浸咗大半日水，令到啲皮膚都皺晒皮。
此外，可盈最近拍咗好多廣告，可謂豬籠入水，佢話：「我都好滿意酬勞，拍完沐浴露廣告嘅內地版，重傾緊拍埋香港版，我都希望快啲成事。」
陳冠希胞姊陳見飛今日喺北京舉行「世紀元素記者會」，宣布簽約內地經理人。至於佢香港嘅經理人合約就簽咗畀黎明契媽黃小清。噚日黃小清喺北京接受訪問時話：「我未做過經理人，都想試吓，咁佢簽咗內地經理人，香港都要有㗎嘛，我咪幫吓手囉。」
黃日華同張兆輝離開咗無綫一段日子，噚日佢哋一齊返無綫執嘢，各自收拾佢哋嘅貯物櫃，交番鎖匙畀無綫，同埋收埋啲尾數。黃日華話：「我都有成半年冇開過locker（貯物櫃），原來有咁多影迷信我都唔知，今日我返到嚟順便收埋囉！」佢早前同明星足球隊去睇世界盃，佢話個旅行團安排得好差，令到佢好唔滿意。
陳慧琳（Kelly）最近為下月中舉行嘅演唱會密密綵排，Kelly之前曾表示喺個唱中會有飛天表演，點知佢練習時發現有阻滯，搞到個表演要取消。Kelly前晚喺電視城時話：「我要吊威吔，但條威吔褲着到成嚿石咁，着埋條面褲之後，好似着咗尿片，下身又肥又核突，最後我哋決定喺觀眾席度起條路軌，等我坐住火車同佢哋拉近距離。」
莫文蔚前晚去電視城出席《勁歌季選》，佢舊愛周星馳（星爺）啱啱過咗四十歲生日，問佢有冇致電祝賀對方，莫文蔚話：「我冇打畀佢，佢好似唔喺香港嘛，送禮物畀佢？我等佢請我食飯就真，佢套《少林足球》咁收得，我有份客串㗎喎。」
楊千嬅同鄭中基呢對過氣情人，前晚前後腳去電視城，出席《勁歌季選》。千嬅攞獎離開之後，鄭中基先至到，兩人無緣碰面。
千嬅話如果見到鄭中基時會同對方打招呼，佢話：「我哋𠵱家一齊拍劇，成日都見啦，我肯定製作公司會攞我同佢做宣傳。」
陳穎妍噚日去尖沙嘴出席活動，佢對於同周立璟蒲蘭桂坊一事，佢話：「其實我同周立璟唔係好熟，我之前係同埋佢女朋友（指AnaR.）食飯，後來佢女朋友冇去。」但佢之前卻話AnaR.嗰晚都喺度。
羅嘉良噚日返電視城幫TVBI拍月曆，佢同向海嵐拍檔做一對。嘉良遲啲會拍新劇，扮演衞斯理。佢早前去咗上海傾公事，有一晚落酒吧消遣時竟有豔遇，嘉良話：「有個女仔走埋嚟話認得我係羅嘉良，又問我攞電話號碼，我有老婆有仔㗎嘛，梗係noway啦。可能對方都係怕寂寞啫，不過我好檢點㗎。」