國際足協話會喺今屆世界盃，增設最有娛樂性嘅球隊呢個獎，但係今屆賽事激烈得嚟唔夠精采，所以要選一支好有娛樂性嘅球隊，難度真係幾高。
十居其九嘅球迷都話今屆世界盃唔好睇，點解？事關啲強隊唔係一早出晒局，就係踢得鬼咁保守，成日怕輸；你唔攻咩，我又唔攻，大家鬥磨。或者有人認為巴西重係好有娛樂性，可以喺五場入咗十五球；但係唔好忘記，佢哋嘅對手係包括中國同哥斯達黎加呢啲弱隊；所以入到波，亦唔代表佢哋打得好同有娛樂性。
之但係，首次參加世界盃嘅塞內加爾，反而就幾有娛樂性。呢隊非洲隊雖然係八強輸俾土耳其而出局，但起碼佢哋真係可以踢到啲進攻足球畀球迷睇。
塞內加爾噚日展開訪台之旅，台灣總統陳水扁猛咁話塞軍喺世界盃踢得好，令台灣人都好光彩，聽起上嚟有啲風馬牛不相及。不過諗深一層，全球得嗰二十幾個國家承認台灣政府，阿扁讚吓友邦亦算合理嘅。
噚日我求大俠咪話意大利光頭球證哥連拿無咩機會執法本屆決賽嘅，估唔到事隔一日形勢已經急轉直下，國際足協喺兩場準決賽清一色用歐洲佬，唔再理洲別因素，所以行情認為光頭佬又有機會擔重任，大家不妨拭目以待。
球王比利係球壇出名嘅烏鴉口，幾乎貼邊隊死邊隊。最近有人連埋佢總共問咗四個球壇烏鴉口（加埋侯利亞、薩加奴同馬拉當拿），其他三人似乎都知自己貼士唔掂，無題南韓入決賽，惟獨比利一於少理照貼南韓入決賽，認真唔畀面東道主。
喺上屆世界盃，香港某電視台老波骨評述員「叉電」鏡頭出街，不B