近年，SUV成汽車市場另一熱賣主流，早已為各大車廠所關注；而早前瑞典富豪車廠亦經已披露咗，遲吓會生產一部較平治ML同寶馬X5車系，更大型嘅SUV新車；而最近亞Mark重收到消息，話呢部名為XC90嘅富豪SUV新車，大抵會響明年初正式踏足香港㖭。據知呢款XC90新車除有載乘七名乘客嘅能力之餘，全天候恒式四驅裝置，匹配佢有兩台2.5公升直5Turbo偈，跟頂級2.8公升直6Turbo嘅T6型號，真係一啲都唔簡單㗎！加埋重有原廠一套5前速Geartronic半自動波箱組合，相信操控性會跟平治ML同寶馬X5睇齊㖭！𠵱家香港代理重已經開始接受預訂，當中XC902.5T嘅價錢，都不過係45萬。睇嚟呢股SUV新勢力，又真係幾有瞄頭噃！有興趣嘅朋友，就不妨落Showroom打聽吓喇！