枱面一堆剪報，資料之中，竟然搵到一封電郵。本來電郵係儲在電腦嘅，但左丁山日日行出行埋，所以秘書每日下載收到嘅電郵，交畀左丁山睇，有時自己睇完隨手一擺，就被湮沒在左丁山枱面亂紙堆之中。
呢封電郵日子係五月十一日，真罪過，好彩讀者William問嘅事，冇過時，照答可也。係問：「暑假期間雅禮協會和耶魯大學協辦一個暑期課程，未知可在哪裏取得資料？」答案好簡單：「呢個課程已經停辦兩年，以後都怕唔會再有。一啲老友好心水清，等到佢哋啲仔女讀到中四升中五，就打電話搵左丁山詢問呢個雅禮協會嘅ACEProgram，但係自從九七、九八、九九年暑假之後，雅禮協會已經取消咗呢個計劃，因為耶魯大學校園內每年都有上千名學生參加種種不同嘅暑期班?課程，雅禮協會覺得冇必要再搞多一個。但參加過九七、九八、九九年三屆嘅香港學生，都覺得二十零人嘅夏令團，照顧得非常好，大開眼界，非常值得。
好多人問左丁山關於夏令團嘅意見，但左丁山唔係專家，唔識答，好對唔住。現在時興送仔女上北京學普通話，聽講理工大學與北京首都師範大學合辦嘅普通話學習團幾有口碑，適宜中四至中七學生參加，收費一萬三千幾，算係適中啦；反而英文夏令營，左丁山只知花多眼亂，唔敢多講。