已經唔止一次點出今屆賽事多利熱門賽果呢個特點，估唔到就連亞洲盤嘅派彩，喺世界盃期間都有呢個趨勢，睇嚟「冇肉食」三個字要戒嘞，奉行「密食當三番」就有運行！
今屆賽事雖然爆出咗唔少冷門球隊及戰果，但係賭波公司嘅派彩就似乎無因為咁，而有特別大嘅分頭喎。最經典嘅例子，可數八強「英巴大戰」一役；巴西勝英格蘭二比一波膽，大部份賭波公司都有八至十倍分頭，但亦有賭波公司臨場盤口得番五點五倍，趕唔切落早飛嘅就會賺少咗三成，究竟係食水深？抑或真係有人臨場重槌敲中呢個波膽呢？
另外，就算亞洲盤呢種概念上係一賠一嘅盤口，都經常會係低水嘅一方勝出。好似前日西班牙對南韓，受讓嘅南韓就一直企喺唔夠九折派彩嘅水位，德國對美國，結果係讓半/一低水嘅德國贏。十六強日本對土耳其，受讓半球派彩八折嘅土耳其贏波；南韓受讓意大利又係低水嘅南韓下盤搞掂。單單睇十六強同埋八強嘅十二場波，就已經有八、九場係低水嘅盤得手，以呢種每次都唔使派十足嘅情況嚟睇，今次世界盃真正「贏家」，會係莊家及賭波公司。
所以，嚟緊重有四場比賽，要乘勝追擊或者收復前失嘅朋友，應該放低一吓嫌派彩少、嫌無分頭嘅諗法；睇清楚啲盤邊隊係真正低水至出手，實行「密食當三番」，好過博冷或者等你嘅心水選擇轉盤。
文：華度