美股續受公司盈警困擾，杜指上周五又大跌逾170點，納指跌勢則略為放緩，仍能守穩在1400之上。美股盈警期仍會維持多兩個禮拜，短期美股表現仍會極度反覆。
美公司盈利不如預期，又或虧蝕和倒退，頗大程度同經濟環境有關，但某程度上，監管機構加緊「check」數，亦係原因之一。在現階段，上市公司唔敢再「美化」帳目，而過往曾經有在帳目上做過手腳嘅公司，亦要迅速作出補救。所以，美公司今次盈警期雖然重有兩個禮拜就告一段落，但可能重有後遺症。
港股受美股拖累，周初料會繼續尋底，但由於跌幅已大，且已嚴重超賣，短期再跌的幅度亦有限。通常大跌市之後，都係博反彈的好機會，今次亦不例外。
過去7個月，港股在10387至12020間上落，形成一個大型徘徊區，現時恒指已跌至徘徊區的底部水平，若跌穿支持位，則會引發較大跌幅。不過，由於大市已呈現超賣，10387水平的支持位暫時應經得起考驗，營造底部後，係展開反彈，抑或再展升浪，仍須視乎外圍表現而定。
上周三，恒指收10673，9RSI14.36；上周五，恒指再跌，收10592，9RSI18.9，由於大市跌勢未止，但只要9RSI仍企於14.36之上並出現反彈，背馳即出現，大市即會反彈，而且幅度會頗為可觀。
去年911事件後，恒指急跌至9493，14RSI同9RSI分別為19.36和14.98，輕微反彈後，恒指再急挫至8934，14RSI同9RSI分別為22.5和20.7，出現明顯背馳，大市開展新上升浪，恒指由9000升上12000，升幅33%。
博反彈，首選係藍籌，滙豐（005）有大行推介，和黃（013）則嚴重超賣，9RSI不足12，呢兩隻股票嘅Call輪都可優先選取。
郭兆誠