南韓球員喺球場上幹勁，有跑唔完嘅氣力，𠵱家就全世界都知道；球場外，南韓人喺街頭都一樣，之不過係有撞開人嘅一鋪「蠻勁」。
相信唔少人到過南韓旅遊都嘗試過喺行街時，經常會被迎面行過來嘅人撞開，又或者被行喺後面嘅人推推撞撞，重要係Sorry都無句；對香港人嚟講一定唔習慣，覺得好無禮貌。
其實，呢種「衝撞式踢法」主要係上一代南韓人先係咁，但年輕一代反而甚少會有呢種行為，可能因為世界盃期間南韓政府拍咗一輯宣傳片，教育年輕球迷有禮貌對待外國球迷。
除咗喺街上嘅人之外，南韓人駕駛技術同樣有帶衝動嘅「蠻勁」，不但夠快，有時重真係好危險，即使條馬路有好多車行緊，都不時出現突然Cut線，差少少就撞埋一齊，呢種情況喺漢城最為嚴重。過馬路好似危機四伏咁，因為小記就曾經見過轉咗綠公仔燈都有車照行，南韓人球場外呢股「蠻勁」真係不敢恭維嘞，重係可恥同可悲嗰隻。