購物焦點：
揀功能太陽眼鏡　玩戶外活動

天朗氣清的夏天，最宜戶外活動，舒展筋骨時，少不免要戴番副太陽眼鏡保護一對靈魂之窗。今年推出的新款太陽眼鏡，除了款靚之外，其功能亦不可忽視，防撞、防滑、透氣應有盡有，最緊要全部都係100%防紫外光，無論登山還是打Golf，靈魂之窗都能夠得到充分的保護。

記者：區佩嫦　攝影：陳穎
Model：傑仔　鳴謝：Fila提供運動服裝及器材

透氣皮布全面保護
打算趁暑假去外地登山或者滑雪的朋友，不如諗諗呢副CEBE的太陽眼鏡，佢可以為你提供最全面的保護。兩邊的鏡臂及鼻架位置均設有透氣的皮布，能完全阻隔正面及兩旁的紫外光入侵，再加上具水銀面及100%防紫外光的鏡片，最啱愛登山的朋友。

不易飛脫防霧氣
這副adidas太陽眼鏡，專為踏單車及極速的運動而設，鏡框以銀色配紅色極富Cyber味。鏡臂具彈性，能緊貼頭形，避免眼鏡因激烈的跳躍動作而飛脫。其100%防紫外光的鏡片能防霧氣，無論處於任何天氣，都唔怕視野受阻。

疏氣孔透氣十足
打Golf需要長時間處於烈日之下，鏡片很容易因長時間照射而出現霞氣影響視線，這副OAKLEY太陽眼鏡的鏡片便專為Golf友而設，一塊過的鏡片上端共有6個半圓形的疏氣孔，令鏡片與皮膚之間的熱氣更易散發，唔怕鏡片出現霞氣。此外，鏡架更可另配其他鏡片，如橙黃色的WarGame鏡片或水銀藍色的登山鏡片等，啱晒鍾意不同戶外活動的人士。

靈活鏡臂360度旋轉
這副Ferragamo的太陽眼鏡，專為賽艇選手或者愛出海的人士而設，具有輕度防水的Polarized鏡片，能消除水面反射的強光，在海上提供清晰的視野。其另一特點是360度旋轉的鏡臂，令眼鏡能緊貼面部，唔怕出現眼鏡跌落水的尷尬情況。

防撞防裂太陽鏡片
鍾意打WarGame的朋友，在選購太陽眼鏡時就要選擇具防撞功能的款式，這副CEBE的太陽眼鏡，鏡片的獨特質料，具有不俗的防撞能力，鏡片不易被擊爆，最啱WarGame一族佩戴。此外，鏡片亦可自行拆除及更換。

其他選擇

可加度數鏡片　近視友最愛
有近視的朋友，選購貼面的太陽眼鏡時，都會出現因弧度問題而未能配近視鏡片的煩惱。呢副CEBE太陽眼鏡，其極具弧度的鏡片，除能緊貼雙眼，為雙眼提供不俗的保護外，更能在眼鏡內套上近視鏡片，即使深近視的朋友都可以擁有呢副有型太陽眼鏡。

附送鏡片隨時換色
近年太陽眼鏡的鏡片如同時裝一樣，可以隨個人需要而隨時換色。好似呢副WEPS的太陽眼鏡，以高纖維的鏡框及鏡片製成，加上100%的防紫外光，令雙眼得到充分的保護。此外，呢副太陽眼鏡更附送另一顏色的鏡片，可讓你隨時更換，夠晒方便。

店舖資料：

頂好（23852777）
旺角豉油街福泰大廈24號A地下

名瞳感（28695111）
中環威靈頓街28號一樓

匯駿
尖沙嘴彌敦道54A-64A號美麗都大廈地下2號舖
查詢電話：27296288

SalvatoreFerragamo（25302908）
中環文華酒店地下1-3號舖