上周六小初睇緊南韓對西班牙場波之時，經紀陳打電話畀小初，神神秘秘話有單獨家料要爆畀小初聽。小初心諗，個市氣氛咁差，股仔就算有堅料都唔易炒得起，不過小初生性八卦，聽吓又無妨。經紀陳話，就快供完股嘅意科控股（943），會出現一個新嘅策略性股東，唔排除公司有一番新面貌。
意科今次2供1，每股12.7仙，供股集資7300萬元。
記得意科剛剛供股之時，經紀陳曾經講過，意科舊年因莊家之間鬧不和，搞到股價長跌長有。今次供股，除集資之外，估計亦與收貨有關。不過，早排意科大股東增持5821萬股之後，股價唔單止唔跌，兼且逆市上升，呢一點實在有無限玄機。
至於今次意科點解會出現新嘅策略性股東？經紀陳話，傳係因為供股認購不足，有個大戶肯攬上身，大戶買入意科，相信唔單止睇好公司前景咁簡單。
慕容小初