問責高官名單終於可以公布，不過，市民大眾相信唔會有乜驚喜，因為人名一早出晒街。好似上周六，《文匯報》即用全版圖文並茂，刊登晒三司十一局五行會成員及特首辦主任、一共二十人之玉照及簡歷；直情憲報咁，重使乜等今朝阿董宣布？
名單再冇驚喜，但八方捧讀《文匯報》之專題報道，發覺不少熟識的人物，有罕為人知的背景，非常有趣，故抄錄部份同大家分享。
例如唯一留低之行政會議成員梁振英，喺英國念書時拍過戲，為張婉婷嘅第一部實驗電影做男主角。又如由D8升做D9之候任政制事務局局長林瑞麟，原來唔止識耍太極，重擅長打羽毛球，唔怪得咁叻將個波拋畀人啦。而鑽石王老五楊永強醫生，在介紹其嗜好一欄，有「收藏古董瓷器」六字，重註明「特別是明朝青花」，呢類嗜好果然富貴！
此外，曾蔭權之嗜好係睇雀仔；孫明揚同葉澍堃鍾意賽馬；廖秀冬原來喜歡彈鋼琴。最頂癮都係葉劉淑儀，佢嘅簡歷有一項係「獲頒獎項」，但只列出一樣：八歲時獲得校際戲劇比賽「最佳童角獎」！
葉劉八歲之後有冇再得過獎八方唔知，但呢一版報道好有收藏價值則可以肯定，雖些內容有少少錯漏（如梁錦松讀英皇書院），但瑕不掩瑜，編排重好有蘋果味呢！
傳真︰2623-9278
電郵︰