內地人生活水準日漸提高，購買能力亦不比港人弱，因此香港人在內地創業也不再局限於低消費物品了。好像在大陸創業數年的陸偉雄，兩年前在深圳福田開業，專門買賣二手音響，直到現在，他不僅開多了一間買賣全新高級音響的分店，還成為一美國名牌音響的中港澳總代理。
記者：羅蘭 攝影：WilsonNg
陸偉雄在大陸創業已有五年經驗，最初主要從事通風系統工程，兩年前他轉營買賣二手音響。
「我早喺90年已喺布吉買樓，諗住退休時住，所以我經常返大陸。直到97年，香港嘅市道開始疲弱，感覺到香港嘅商機愈來愈少，相反深圳就發展得唔錯，於是我結束香港的室內工程生意，搬上大陸發展。做咗幾年，我開始熟悉呢度嘅環境同生意手法，又結交咗唔少朋友，知道深圳市場嘅變化，加上自己係音響發燒友，所以我決定要拓展音響市場。」
音響可以話係一門高級藝術，不單止學問高深，連價錢亦比其他電子產品高出多倍，所以最初創業時，陸生只從事二手音響買賣。
「就算二手價，動輒都要幾萬蚊，初時邊有咁多錢，梗係做二手生意啦。我呢度嘅貨源主要係同香港攞，因為自己係發燒友，所以識好多同道中人，貨源就唔成問題。」
接着便是尋找舖位，陸生知道福田區的華強北路是全中國電子產品的集中地，幾乎全國各地的人都懂得來這裏買音響，於是便鎖定目標，尋覓理想舖位。陸生話單是找舖位，已花了三個月時間。
陸生謂因為音響生意比較簡單，所需的牌照亦較食肆的少，只需要領有工商營業執照、消防執照及稅務登記便可，辦理的時間只需五個工作天，費用合共少於一百元人民幣。
「開舖時都算幾順利，可能因為一早已有經驗，知道要申請乜嘢牌照。不過諗番起最初嚟呢度做生意，好多嘢都係估唔到嘅。例如我以為呢度好似香港咁，申請一個營業執照就可以做生意啦，點知佢哋重要你申請消防執照、稅務登記咁。稅收種類又繁複，只要你賣一件貨品，就已經要畀稅，到年尾又要交另一種稅，所以都好麻煩。
「又好似請員工，喺香港我畀錢你做嘢就得啦，但喺呢度，做老細嘅要幫員工辦暫住證，因為深圳好多人都係外省嚟嘅；最奇怪就係連佢哋嘅生育證、未婚證我都要幫佢哋攞埋，老實講，我真係唔明白佢哋嘅家庭狀況、生幾多仔女關我乜事。總之喺大陸做老細，就好似做家長咁乜都要理，但上到嚟就要適應。」
在陸生的二手店內，賣的音響品牌有Real、Magnum、Oracle等，價錢由?3,000至?150,000都有，無論是高價或低價貨品，都有一班捧場客。
「通常入門嘅發燒友都會由低價玩起，然後就開始買高價貨。唔好睇小內地人，我試過有熟客可以喺十幾二十分鐘內買二十幾萬貨，又有好多北京客專誠搭飛機嚟買，因為暫時喺深圳賣高級音響嘅，只有十幾間舖頭，而賣二手音響嘅，連埋我就只有三間。
「喺大陸做生意，最緊要畀面啲客，因為嚟買嘢嘅人，多數係單位領導又或高幹子弟，所以最初跟佢哋做生意，寧願以成本價賣，又或自己蝕少少，都要畀面佢哋。等到第日佢哋再嚟買嘅時候，至同佢哋講清楚，然後酌量賺少少。」
正因為懂得掌握客人心理和適應內地做事方式，陸生的音響生意不斷擴展，半年前更在二手店的對面開多一間音響店，專門做新音響買賣。
「初時資本唔夠就要賣二手貨，𠵱家我賣嘅全新音響，最貴嘅一套要成過百萬。除咗賣新音響外，我又設咗一個網站，同做咗美國一個音響品牌嘅中港澳代理。
「不過國內嘅資訊比香港慢，而且音響市場喺大陸只發展咗十幾年，客人嘅音響知識唔深，所以好多時我都要做多啲廣告宣傳，因為當客人唔識嘅時候，就係靠睇廣告，可以話邊個出得多廣告，邊個就係名牌，所以有時我哋一個月要花兩萬蚊做宣傳。」
由開舖至今，陸生表示早已回本，不過會把賺回來的錢再投資在店上。
「其實舖頭開咗一年我就已經回本，𠵱家我嘅倉都『責』咗成二百萬貨，你知啦，個雪球係愈滾愈大㗎嘛。其實深圳唔係我嘅重要客源，佢只佔我生意額嘅四成，其餘六成就係靠外省人幫襯，香港人都有，但唔多。做呢行收入好唔穩定，試過一個月有過百萬營業額，最差嘅一個月只得十幾萬都有，真係所謂好天斬埋落雨柴。」
1.市場調查：調查市場能否接受該生意類型。
2.人事關係：能減少不必要的麻煩。
3.多做多試：深信船到橋頭自然直，多做自會知道其中竅門。
4.要有信譽：由於大陸充斥冒牌貨，內地人又對音響認識不深，所以要貨真價實，博取客人信任。
5.入鄉隨俗：要在內地營商，最好去適應當地的遊戲規則，不可只用香港的一套標準去衡量。
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。