同旺角零售界另一代表經紀李收料，要數近期區內熱門商場，佢話除咗係人都知嘅潮流特區同兆萬外，原來有唔少人吼實「皆旺」，呢個場半年前重容易搵個吉舖，幾千蚊有交易，但最近突然爆晒棚，想搵個舖位都難。尤其以地庫最搶手，十足十縮水潮流特區，想租舖唔該排半年，又成最近淡巿奇葩。
經紀李：「做生意嘅人一定信風水，就算信開耶穌，開張嗰日都照樣拜四角。行內傳聞早排有個玩具舖喺皆旺食到條好水，狠狠撈咗筆，從此認定呢度係福地，唔少老闆仔收到風搬過嚟，都撈得唔錯。」
原來經紀李請教過玄學家小神仙L，佢指出呢個場起碼可以旺到04年，搞到經紀李心郁郁想搬埋過嚟。
小神仙L最近喺巴士有個玄學常識節目，人氣在急升中，官仔骨骨外表又鍾意着關刀別注波鞋，都算幾In，所以同唔少後生有計傾，聽講好多潮流舖老闆開張前都搵佢幫手解疑難。所以見到有時有啲舖成間白色未必只為扮有型，可能係風水布陣都未定。
主持人：大食Jack
八卦熱報：