大發Copen開篷小跑車，終於響上星期三（6月19日）正式響日本本土登場喇！一如早前所料，新車造型簡直係奧迪TT嘅縮水版，除前後圓渾嘅賣相夠吸引外，四輪15吋合金軨、原廠尾翼同雙出式尾喉組合，重好有一分神似感㖭！至於雙座位車廂設計，好有一份跑車氣息之餘，頂級版重有Momo軚環等裝備，倒真係號召力十足㗎！全車830kg重量，以一台660cc直4DOHCTurbo偈驅動，加速輕快有感，難得個電動硬頂開合亦好有說服力，跟大型開篷跑車可謂不遑多讓㗎！早前香港代理經已接受預訂，而日本早已預計有供不應求嘅情況，相信對香港亦有一定影響；但據聞7月下旬，會有少量Copen率先抵港，有興趣嘅朋友就要拭目以待喇！