上個周末，部全新萬事得Mazda6，終於響香港正式登場；呢部用上歐洲車底盤設計嘅日本車，可謂打破一貫萬事得車系嘅傳統，加上佢矛頭直指係香港版嘅凌志IS200，所以亞Mark對佢特別有興趣，重趁住嗰日上午未有世界盃賽事直播嘅時間，走咗落去尖沙嘴睇車㖭！一如亞Mark所料，部Mazda6嘅開賣價，都不過係17萬咋！而部剛啱空運抵港嘅五門掀背版Mazda6Atenza-S，有齊全車包圍、17吋跑車合金胎軨、全車真皮座椅等配備，定價都不過為20萬3千8，要較凌志IS200足足便宜接近3萬，聽落又真係好吸引噃！
響場上亞Mark重碰見萬事得老頂嘅莫Sir，睇佢蓮子蓉咁嘅口面，似乎對部Mazda6胸有成竹；佢重對亞Mark講，話部新車質素咁高，設備齊全之餘，車價定位重係聽取一班汽車傳媒人嘅意見後決定，相信對同級日本車有一定競爭力外，重可以搶到唔少中型歐洲車嘅市場㖭！