近期世界盃大晒，假日示範單位場面亦靜咗好多，噚日冇波睇，唔少新盤睇樓人士都多咗，其中有歌星獻唱，同免費快餐供應嘅港灣豪庭就十分旺（圖），每有表演都吸引唔少街坊拖男帶女欣賞，免費快餐炸雞，亦係唔少街坊的重點目標。
不過，有業內人士卻苦笑講：「啲客唔睇波就掛住聽歌，幾時先會買樓㗎？」
其實，港灣豪庭已經算係近期交投較多嘅新盤，除發展商宣傳策略成功，地產代理落力推銷亦起好大作用，恒基近幾日都有頒發獎狀鼓勵各大代理，而鴻運同中原亦先後發稿，表示獲得發展商嘉許，中原獲頒發「港灣豪庭銷售代理佣金武士獎」，而鴻運則攞到最佳銷售獎座，重話今個星期會頒發足金金牌，鼓勵促成交易嘅手足。
蘭西