陳彥行前晚同黃泆潼喺旺角一間酒吧，出席「世界盃激戰全城」活動，佢兩個重同啲客人玩遊戲，鬥快喺客人身上放最多波。
行姐透露佢有份拍嘅《皆大歡喜》添食至三百集，佢因此爆騷賺唔少，佢話想買層二千呎嘅樓，要有三間套房，不過𠵱家未夠錢畀首期，問佢係咪留番間套房畀鄧兆尊？行姐話：「我包晒所有《皆大歡喜》演員好唔好？」問如果兆尊去佢屋企，係瞓佢間房定客房？行姐講笑話：「佢瞓廳呀！」
而前晚行姐雖然係幫間吧做宣傳，但佢竟然話自己唔鍾意睇波，重話為咗自己安全，盡量唔會去酒吧睇波，不過行姐話：「今屆有咁多靚仔球星，雖然好多人鍾意碧咸，但我就鍾意朗拿度，夠cute呀。」
恬妞前日喺上環舊警察宿舍拍攝亞視新劇《法內情2002》，喺劇中恬妞飾演當年由葉德嫻扮演嘅角色，故此塊面有一道疤痕。恬妞近期明顯清減咗，原來當初蕭若元搵佢做呢個角色嘅時候，佢簡直唔敢相信，重叫蕭若元睇吓佢身形先算，恬妞話：「蕭若元話我起碼要減二十磅，我𠵱家一百零六磅，我呢世人最瘦係𠵱家。」
台灣三人女子組合S.H.E前晚接受新城電台節目訪問，新城特別準備叉燒酥同點心畀佢哋品嘗，結果佢哋就好似餓鬼一樣狂食點心同芒果西米露，問唱片公司有冇要求佢哋節食減肥？成員之一陳嘉樺用國語話：「公司不理的，放棄我們了。」
梁詠琪（GiGi）噚日到商台，為「叱咤903無煙無掛新一代」漫畫課程挑選四十名學員。據GiGi透露，入圍嘅學員將有機會喺暑假上四堂由歐陽應霽教授嘅漫畫班，佢亦會參與其中一堂。GiGi重話自小已學習繪畫同鋼琴，而佢個龍鳳胎細佬就被迫學二胡，可惜細佬最終都學唔成，否則就可以組一隊名副其實嘅Twins啦。
周海媚（海味）噚日帶現年兩歲多嘅姨甥女去黃埔出席一個宣傳活動，佢抱住姨甥女影相，可能小朋友唔習慣面對鏡頭，所以一度想喊。海味話：「我專登帶姨甥女出嚟，希望佢可以見多啲大場面，不過佢就好怕醜。」海味表示近日都好留意世盃嘅賽事，佢尤其鍾意意大利球員韋利同迪比亞路。
黃伊汶同陳曉東噚日到港台出席「世界要童心」傳意卡設計比賽頒獎禮，黃伊汶話佢曾經用兩個禮拜畫一幅風景畫參賽，而且得到冠軍。黃伊汶重自爆小時嘅頑皮事，佢話：「我細細個時同隔籬屋啲小朋友唔啱，所以我會將啲狗屎拋去佢哋個天台嗰度。」
朱慧珊噚日喺亞視錄影最後一集遊戲節目《群雄奪寶》，佢特登着咗套紅衫嚟旺吓。朱慧珊重得到公司安排獻花，十分受重視，但佢話：「唔可以咁講，每次情況都唔同。我忙完呢個節目，就會返去新聞部，七月中會有個新聞新節目，我喺回歸期間又會主持兩個回歸騷，都會好忙。」
趙世光噚日同老婆何琍琍、兩個女由上海返港，一家四口樂也融融咁出閘，認真羨煞旁人。係人都知趙世光有位紅顏知己譚玉梅，而佢老婆何琍琍就專心喺上海打理生意，今次趙世光夫婦一齊返港，證明佢對女人真係幾有辦法。