趙飛雲睇好嘅巴西隊擊敗英格蘭進入4強，第5次奪取世界盃一片坦途。不過，唔知巴西球員會唔會擔心巴西貨幣雷阿爾急跌，贏波獎金變相大縮水？
睇嚟英國同南美洲國家都係前世撈亂骨頭，繼阿根廷之後，巴西金融風暴危機又傳到一觸即發。個多星期前，市場已傳出巴西醞釀金融危機，亦成為其中一個質低滙豐（005）股價嘅藉口，因投資者憂慮滙豐在巴西嘅業務，會繼阿根廷之後出現重大撥備。穆迪調低巴西評級後，巴西貨幣及股債下挫，令投資者更關注滙豐在巴西嘅業務情況。
美股上周五持續大挫，標普500指數收989.14，與911事件低位944.75相差不足5%，納指亦與911事件低位1387.05相距不足4%，杜指稍好，但9200點支持亦岌岌可危。美元下滑，美股PE過高，成為資金撤出美股藉口，不過樂觀啲睇，流出嘅美資如果買港股，其實無蝕滙價嘅風險，或者會流入相對亞洲其他股市落後嘅港股。
外圍形勢偏淡，恒指今日有機下試大型橫行區底部10400，滙豐走勢將係短期大市關鍵，如果滙豐喺巴西傳出不利消息，成為大戶造淡力質嘅對象，滙豐Put輪9051及9034均有短炒機會，但港股已超賣，隨時有反彈，Put輪只宜貼市玩吓短炒。
趙飛雲