米字國大軍噚日返到老家，碧咸、奧雲異口同聲話自己響今屆決賽周帶傷落場，踢得幾辛苦咁話喎。其實呢個係好多球星響今屆面對嘅問題，怨就怨歐洲頂級賽事頻密，搞到球星未踢世盃已先殘。無錯，佢哋失色幫咗弱隊，令今屆賽事緊湊咗；不過睇見呢班星級戰將踢唔到最高水平，同埋睇唔到多啲強隊互撼場面，始終係球迷損失。
除咗呢兩個英格蘭萬人迷之外，法國嘅施丹、葡萄牙嘅費高同埋阿根廷嘅基斯普等等，響決賽周都受不同程度傷患困擾；佢哋球隊提早執包袱，好大程度同佢哋踢唔到最高水平，甚至缺陣有關。日本嘅小野伸二重慘，到日本出局後佢至有時間去割咗條困擾佢好耐嘅盲腸。
響呢個商業掛帥嘅球壇，歐洲賽規模愈嚟愈大，表演賽愈嚟愈多，賽期密到咁真係鐵打都死，國際足協同歐洲足協真係要做番啲應變方法囉。
塞內加爾前晚對土耳其踢到走晒樣，搞到入唔到世界盃四強；事後，即刻有人話佢哋打假波；又有人話佢班球員因為錢聚腳，同埋驚受傷轉唔到會而唔敢去盡。最抵死係大陸網站吹風，話麥素證實佢哋球員晚晚去滾，所以變晒軟腳蟹，信唔信由你。
英格蘭唔單止喺八強出局，連球員家屬亦好黑仔，好似到日本打氣嘅中場畢特嘅爸爸泰利咁，當佢同英大軍一齊返英時，就俾日本警方拘留，因有個足球流氓跟佢同名同姓，日本警方重盤問咗世伯三粒鐘，連球員老竇都當賊扮，唔怪得話今屆冇晒足球流氓啦！
講開又講，如果蘇古唔係猛咁失機，土耳其喺九十分鐘已經搞掂咗塞內加爾。老實講，話晒蘇古都係土國最托嘅足球員，但佢居然喺門前漏油，真係抵佢俾公仔箱啲講波佬話佢連業餘球員都不如。蘇古𠵱家沉成咁，睇怕喺禮拜三對巴西，教練根尼斯排陣都要諗清楚囉。
意大利籍球證哥連拿睇怕冇乜機會吹今屆世界盃決賽囉。事關如果德國入決賽，為咗公平起見，佢執法嘅機會唔係咁大；之但係就算入決賽嗰隊係南韓，佢可能一樣冇份吹。家吓意大利同南韓啲關係搞到咁僵，國際足協費事南韓仔多嘢講，會唔會再畀光頭佬吹呀。