對於世界各地抨擊南韓贏西班牙，係拜球證所賜，南韓電視台SBS噚日嘅晚間新聞，就特別用多角度、慢鏡重播，希望為球隊大平反；佢哋話經電腦判決，指祖亞昆嘅底線傳中球已經出界，但佢哋嘅慢鏡重播就點睇嗰波皮都冇出界；反而香港有線嘅「篤篤板」垂直角度慢鏡重播，就睇到嗰球喺出咗少少界，睇嚟SBS要即時向有線借帶嚟平反嘞。
六月二十五日對南韓人嚟講，除咗係南韓世盃四強賽對德國，原來追溯到一九五三年六月二十五日，正是北韓攻打南韓的悲慘日子，每一個南韓人自細讀歷史都會銘記於心。但如果南韓今次能打敗德國晉身決賽，唔知會唔會將這威水史寫入史書。
原本南韓政府計劃在周二嘅南德大戰列為公眾假期，但因本月中已將國會選舉日列為假期，政府唔想六月有太多假期而將計劃取消息，但政府「補飛」話如果南韓隊打入決賽，無論輸贏都會將決賽翌日（即七月一日）列為公眾假期。