地產C上星期某日到尖東開會，九時半到達MF中心，只見停車場內泊咗唔夠二十部車，佢記得六個月前同樣時間嚟過，好辛苦先搵到一個車位，乜𠵱家咁易搵位呀？問門口「實Q」，阿伯話：「大家慳吖嘛，揸車返工嘅人少晒，樓上唔少公司執咗搬走晒，停車場邊會爆棚！」
地產C見完客，落番條街，順便巡吓商場，真係唔多見人流，冷清清，行行吓撞到公子F，公子F原來嚟尖東視察現場環境，有乜好睇呢？公子F對地產C講：「我二十幾年前尖東啱啱興旺嗰陣，買咗H中心商場兩個舖位，呎價二千，一路冇賣到，今年上半年開始租唔出去，六月初叫經紀放盤，佢話呎價只值幾百，我嚇咗一跳，於是今日走嚟睇吓乜嘢環境，好似真係好曳噃。」好彩公子F身家豐厚到極，揸樓以一幢幢計，唔係一層層計，兩個舖位蝕大本，濕濕碎啦。
地產C後來揸車往廣東道，一到咗柯士甸道就塞住晒，大部份由公主道落漆咸道嘅車都轉右入柯士甸道鬥塞，小部份直去，好少轉左入尖東，地產C不禁喟然而歎，居然打電話問左丁山：「九龍倉啲股票買唔買得過？」講咗一輪，左丁山先至明白佢嘅邏輯，尖西當旺，最益九倉廣東道嘅物業，但股票唔係咁單純，左丁山叫佢睇定一啲先，地產股仍然會係牛皮靠軟㗎！